1. Namn
Namnet på forsamlinga er Vik bedehusforsamling.
2. Vedkjenning og tilhøyrsle
Forsamlinga er tilslutta Indremisjonsforbundet (ImF) og Norsk Luthersk Misjonssamband (NLM) og er med det forplikta på Bibelen og Den evangelisk-lutherske vedkjenninga (Den apostoliske truvedkjenninga, Den nikenske truvedkjenninga, Den athanasianske truvedkjenninga, Den augsburgske vedkjenninga/konfesjon og Luthers vesle katekisme).
Forsamlinga legg både NLMs og ImFs grunnreglar og retningsliner til grunn. Ved ulikskapar forpliktar forsamlinga seg likevel til å vareta retningslinene til begge organisasjonane.
3. Føremål
3.1 Forsamlinga sitt føremål er å breia ut Guds rike lokalt, i Noreg og på NLM sine misjonsfelt.
3.2 Forsamlinga vil forkynna Guds ord og forvalta sakramenta. Forsamlinga vil også læra opp barn, unge og vaksne til liv og teneste i Guds rike.
4. Medlemskap
4.1 Medlemskap i forsamlinga kan teiknast av personar som:
a) Vedkjenner seg til den kristne trua og er døypt.
b) Vil arbeida på den læremessige basis og etter dei føremåla som kjem til uttrykk i §2 og §3.
4.2 Barn av foreldre som er medlemmar vert skrivne inn som medlem ved dåp. Barn som er døypte i andre forsamlingar eller kyrkjelydar vert skrivne inn etter melding frå føresette.
4.3 Medlemmar vert opptekne etter medlemssamtalar.
4.4 Medlemmar som lever i strid med Guds ord skal formanast i samsvar med Matt. 18, 15–18.
4.5 Medlemmar som ikkje lever i samsvar med §2 i denne lova, og som ikkje rettar seg etter
gjentekne oppmodingar frå eldsterådet i forsamlinga, kan mista medlemskapen sin.
5. Årsmøte
5.1 Forsamlinga sitt årsmøte skal haldast så tidleg som mogeleg på nyåret, og dato for årsmøtet må vera kunngjort to månader før årsmøtet.
5.2 Alle medlemmar som har fylt 15 år har rett til å røysta på årsmøtet.
Årsmøtesaker:
1. Årsmelding og revidert rekneskap.
2. Val
a) Styre med varamedlemmar.
b) Eldsteråd.
c) Revisor.
d) Valnemnd for neste årsmøte.
3. Samtala om arbeidet som gjekk og drøfting av visjon, mål og arbeidsplan for arbeidet framover.
5.3 Medlemmar som har betalt kontingent kan røysta på årsmøtet. Nye medlemmar må vera innmeldt og ha betalt kontingent ein månad før årsmøtet.
5.4 Saker som skal handsamast på årsmøtet må vera kunngjort på vanleg måte minst tre veker i forkant. Saker som medlemmar fremjar seinare eller på sjølve årsmøtet, kan ikkje handsamast reelt, men skal sendast vidare til styret.
5.5 Valkomité skal veljast av årsmøtet. Valkomiteen består av tre personar som skal veljast for to år av gongen. Kvart år skal det veljast inn vekselvis eitt eller to medlemmar.
6. Leiing
6.1 Styret
6.1.1 Styret skal leia Vik bedehusforsamling si verksemd, vareta forsamlinga sine interesser og sjå til at verksemda vert drive i samsvar med forsamlinga si vedkjenning, tilhøyrsle og føremål.
6.1.2 Styret forvaltar forsamlinga sin økonomi og eigedom. Styret er ansvarleg for drifta av forsamlinga og har arbeidsgjevaransvar for eventuelle tilsette. Styret skal setja i verk det som vert vedteke av årsmøtet og medlemsmøte, som høyrer inn under styrets ansvarsområde.
6.1.3 Styret består av fem medlemmar og to varamedlemmar. Styret konstituerer seg sjølv med leiar, nestleiar, sekretær og eventuelle andre funksjonar. Leiaren for styret skal veljast for eitt år om gongen. Valperioden for styremedlemmane er to år. Varamedlemmar skal veljast for eitt år.
6.1.4 Styret førebur forsamlinga sitt årsmøte og legg fram saksliste, årsmelding og revidert arekneskap.
6.1.5 Ein eventuell forsamlingsleiar skal ha tale- og forslagsrett i styret, men ikkje røysterett.
6.1.6 Styret og eldsterådet skal møtast regelmessig (minst to gonger årleg) for å samtala om arbeidet, og syta for god samhandling i forsamlinga.
6.2 Eldsteråd
6.2.1 Eldsterådet har hovudansvar for forsamlinga si andelege verksemd og skal sjå til at den vert driven i samsvar med forsamlinga si vedkjenning, tilhøyrsle og føremål. Eldsterådet skal vareta eit særskilt hyrde- og læreansvar ved å sjå til at forkynninga, sakramentsforvaltninga og forsamlingslivet er i samsvar med Guds ord og Den evangelisk-lutherske vedkjenninga. Ved avvik eller lærestrid har eldsterådet ansvar for rettleiing og formaning.
6.2.2. Eldsterådet skal setja i verk det som vert vedteke av årsmøtet og medlemsmøte, som høyrer inn under eldsterådet sitt ansvarsområde.
6.2.3 Eldsterådet består av minst tre menn, som har dei karaktertrekka Bibelen seier (1 Tim 3.1-7, Tit 1.5-9), og har tillit i forsamlinga.
6.2.3 Funksjonstida er seks år, men ein eldste kan veljast att for seks nye år. Etter to samanhengande periodar kan ein eldste veljast att etter minst eitt års opphald.
6.2.4 Ein eventuell forsamlingsleiar er medlem av eldsterådet i kraft av stillinga si. Han er ikkje bunde av funksjonstid.
6.2.5 Eldste skal innstillast av styret og eldsteråd saman. Forslag til eldste kan meldast til styret og/eller eldsterådet. Kandidatar som får 2/3 fleirtal, skal leggjast fram til val i årsmøtet. Det skal fremjast same tal på kandidatar som talet på eldste som skal veljast.
6.2.6 Eldsterådet konstituerer seg sjølv.
7. Økonomi
7.1 Forsamlinga tek ansvar for drift av hus og eige arbeid, ImFs og NLMs arbeid i Noreg og NLMs misjonsarbeid internasjonalt. Styret avklarar fordelinga.
7.2 Andre organisasjonar som deler forsamlinga si vedkjenning er velkomne til å driva aktivitet og innsamlingsarbeid i samråd med forsamlinga sitt styre.
7.3 Dersom løna stab er tilsett i ein av organisasjonane, skal kostbeløpet overførast til organisasjonen staben er tilsett i. Dette skal sjåast på som middel til eige arbeid. Det økonomiske bidraget/budsjett skal avklarast årleg med organisasjonen som arbeidaren er tilsett i.
7.4 Ved tilsetjingar skal forsamlinga rådføra seg med begge organisasjonane.
8. Endring av lovane
8.1 Endring av desse lovane kan verta vedteke på årsmøtet med 2/3 fleirtal når forslag er innsendt til styret minst seks veker før årsmøtet.
8.2 Endringar av lovane må ikkje vera i strid med grunnreglane i NLM og ImF.
9. Uforanderlege særlovar for Vik bedehus
Vedteke i 1937 rev. 16. februar 2013
9.1 Vik bedehusforsamling byggjer si verksemd på Bibelen og Den evangelisk-lutherske vedkjenninga.
9.2 Til styret skal det veljast kristne, som vedkjenner seg den evangelisk-lutherske vedkjenninga.
Dei må syna det i liv og læra og vera medlemmer av Vik bedehusforsamling.
9.3 Bedehuset «Sion» på Vik i Øygarden kommune står på sjølveigande grunn etter tinglyst grunnsetel.
9.4 Huset – ved Vik bedehusforsamling eig seg sjølv når gjelda er betalt.
9.5 Skulle det nokon gong henda, det Gud i nåde må hindra, at huset ikkje kan brukast etter sine vedtekter som bedehus, skal styret be Norsk Luthersk Misjonssamband, Indremisjonsforbundet eller ein tilsvarande evangelisk luthersk organisasjon driva arbeidet til det vert danna eit nytt styre på staden. Huset må ikkje verta ståande som morolokale, og ikkje brukast i antikristeleg arbeid.
9.6 Huset må haldast assurert. Skulle huset brenna, skal styret snarast utbetra skaden eller byggja nytt hus. Medlemmane må straks kallast saman til samråding.
Vik, 27. april 2019